పవన్ కళ్యాణ్ చివరకు ఇలా మిగిలి పోవాల్సిందేనా.. వైసిపి ఎన్డీఏలో చేరుతుందా.. చేరితే ఎన్ని మంత్రిపదవులు తీసుకుంటారు.. ఒకవేళ బయట నుంచి మద్దతు ఇచ్చి ఊరుకుంటారా.. ఇలాంటి సవాలక్ష ఊహాగానాలు వినపడుతున్న సందర్భమిది. జగన్ ఢిల్లీ పర్యటనతో ఏపీ రాజకీయాల్లో ఒక్కసారిగా హీట్ పెరిగింది. అందరూ అనుకుంటున్నట్లు చంద్రబాబు తీవ్ర ఉత్కంఠలోనే ఉన్నారు.

అయితే అంతకు మించి ఇబ్బంది పడుతున్న వ్యక్తుల్లో పవన్ కళ్యాణ్ మొదటి స్థానంలో ఉంటారు. ఏపీ సీఎం జగన్ మోహన్ రెడ్డి అంటే పవన్ కళ్యాణ్ కి సుతారమూ ఇష్టం లేదు. జగన్మోహన్ రెడ్డి అని పూర్తి పేరు పిలవడం కూడా ఆయనకు ఇష్టం లేదంటే.. జగన్ పై పవన్ కు ఎంత జలసీనో అర్థం చేసుకోవచ్చు. అలాంటి జగన్.. ఇప్పుడు పవన్ స్నేహం చేస్తున్న బీజేపీతో దోస్తీ కడుతున్నారు.

వైసీపీ NDA లో చేరినా, చేరకపోయినా రెండు పార్టీల మధ్య ఉన్న సంబంధాలు మాత్రం రోజురోజుకూ పటిష్టపడుతున్నాయని చెప్పక తప్పదు. ఆమధ్య కేంద్ర విద్యుత్ శాఖ మంత్రి జగన్ ను ప్రశంసించడం.. ఇటీవల ప్రధాని మోదీ ఏపీ సచివాలయ వ్యవస్థను ఆకాశానికి ఎత్తడం చూస్తుంటే జగన్ పై వారికి మంచి అభిప్రాయం ఉన్నట్లు అర్థమవుతోంది. కేంద్ర నాయకత్వానికి ఉన్న అభిప్రాయాన్ని బట్టి రాష్ట్ర నాయకత్వం కూడా మసులుకుంటోంది.

అంటే రాష్ట్ర బీజేపీ కూడా జగన్ ని కానీ.. జగన్ పథకాలు కానీ ఏకపక్షంగా విమర్శించే సాహసం చేయరు. ఇప్పుడు సమస్యల్లా పవన్ కళ్యాణ్ దే. జగన్ ఢిల్లీ పర్యటనతో పవన్ అడకత్తెరలో పోకచెక్కలా మారారు. జగన్ తో బిజెపి స్నేహం, పవన్ కి ఇష్టం ఉన్నా లేకపోయినా ప్రస్తుతానికి సర్దుకు పోవాల్సిందే. ఇప్పటికిప్పుడు ఈ వంకతో పవన్ బీజేపీ కూటమి నుంచి బయటకు వచ్చే అవకాశం లేదు.

తనకు తాను సీఎం కుర్చీకి గట్టి పోటీగా భావించే పవన్ కళ్యాణ్, వచ్చే ఎన్నికల్లో నైనా తన అదృష్టాన్ని పరీక్షించుకోవాలని అనుకుంటున్నాడు. బిజెపి, వైసిపి దోస్తీతో రాష్ట్రంలో పరిస్థితులు తారుమారైతే , పవన్ ఆశలకు గండి పడ్డట్టే. అందుకు ఆయన కచ్చితంగా 2024 నాటికి ఆకూటమి నుంచి బయటకు రావాల్సిన పరిస్థితి. పవన్ బయటకు రావాలే కానీ ఎరవేసి పట్టుకోవడానికి చంద్రబాబు రెడీగానే ఉన్నారు. మరి బయటకు వచ్చి చంద్రబాబుకి బలికావడమా, లేదా బిజెపిలోనే ఉండి వైసీపీతో కూడా చెలిమి చేయడమా తేల్చుకోవాల్సింది పవన్ కళ్యాణ్ మాత్రమే.

ఒకవేళ వైసిపి, బిజెపి, జనసేన కూటమి కుదిరితే పవన్ కంటే అదృష్టవంతులు ఎవరూ ఉండరు. పోయినసారి రెండు చోట్ల ఓడిపోయిన పవన్.. వచ్చేసారి ఖచ్చితంగా అసెంబ్లీలో కూర్చునే అవకాశం వచ్చినట్లే. అక్కడితో సంతోష పడితే బాగుంటుంది. లేకపోతే సీఎం కుర్చీనే టార్గెట్గా పెట్టుకుంటే మాత్రం 2024 నాటికి పవన్ ఏకాకిగా మిగలాల్సిందే.