భారత ప్రధాని నరేంద్ర మోడీ ఇవాళ 100 రూపాయల నాణాన్ని విడుదల చేశారు. బీజేపీ వ్యవస్థాపక సభ్యుల్లో ఒకరైన విజయరాజే సింధియా శతజయంతి సందర్భంగా స్మారక నాణాన్ని ప్రధాని మోదీ ఒక వర్చ్యువల్ కార్యక్రమంలో భాగంగా విడుదల చేశారు.

రాజ్ సత్తా కన్నా జన్ సత్తా ముఖ్యమని రాజమాత నిరూపించారని ప్రధాని మోడీ అన్నారు. అంటే అధికారాన్ని గుప్పెట్లో పెట్టుకోవడం కంటే ప్రజలకు సేవ చేయడమే ముఖ్యం అని అర్థం. స్వాతంత్య్ర పోరాటం నుంచి స్వాతంత్య్రం వచ్చిన దశాబ్దాల వరకు ముఖ్య రాజకీయ ఘటనలకు రాజమాత సాక్షిగా నిలిచారని మోదీ అన్నారు.

గత 60 ఏళ్లలో భారత దేశానికి ఓ దిశను చూపించిన ప్రముఖ రాజకీయ వేత్తలలో రాజమాత కూడా ఒకరు అని చెప్పారు. ఆమె నిర్ణయాత్మక నాయకురాలని మోడీ అన్నారు. స్వాతంత్య్రానికి ముందు విదేశీ దుస్తులను కాల్చడం మొదలు కొని.. రామమందిరం ఆందోళన వరకు కూడా ఆమె అనుభవం గొప్పది అని గుర్తుచేసుకున్నారు. రామజన్మభూమి కోసం ఆమె చాలా కష్టపడ్డారని.. ఆమె శతజయంతి వేళ ఆ కల సాకారం కావడం సంతోషంగా ఉందన్నారు మోదీ.

విజయరాజే సింధియా రాజవంశానికి చెందిన వ్యక్తి అయినప్పటికీ చాలా సంవత్సరాలు జైలులో గడిపారు. ఎమర్జెన్సీ కాలంలో ఆమె తన కూతుళ్లకు జైలు నుంచే లేఖను రాశారు. తాను ప్రస్తుతం చేస్తున్న పోరాటం, త్యాగం భవిష్యత్ తరాలకు ప్రేరణగా నిలవాలని ఆ లేఖలో పేర్కొన్నారు. భవిష్యత్తు తరాల కోసం ఆమె తన సుఖాన్ని విడిచిపెట్టారు.

ఇక ఈ ఏడాది ఆరంభంలో విజయరాజే సింధియా మనవడు జ్యోతిరాదిత్య సింధియా కాంగ్రెస్తో దశాబ్దాల బంధాన్ని వీడి బీజేపీలో చేరిన సంగతి తెలిసిందే. జ్యోతిరాదిత్య సింధియా జాతి ప్రయోజనాల కోసం బీజేపీలో చేరారని విజయరాజే సింధియా కుమార్తె, జ్యోతిరాదిత్య సింధియా అత్త ప్రస్తుత బీజేపీ ఎమ్మెల్యే అయినటువంటి యశోధర రాజే పేర్కొనడం గమనార్హం.

మొత్తంగా పార్టీ సీనియర్ నేతలను గుర్తుచేసుకోవడం.. తరువాతి తరం కార్యకర్తలకు వారిని ప్రేరణగా నిలపడం.. వారికి సముచిత గౌరవ స్థానం ఇవ్వడంలో బీజేపీ ముందు వరుసలో ఉంటుందని చెప్పవచ్చు. ముఖ్యంగా దేశ సేవకు తమ జీవితాలను అంకితం చేసిన ఎందరో ప్రముఖులను తమ పాలనా కాలంలో గుర్తించి, గౌరవించే ఘనత బిజెపి సొంతం అంటూ విమర్శకులు సైతం ప్రశంసలు కురిపిస్తున్నారు.